Hozketa eta izozketa kontserbaziorako metodoak dira, eta hotza darabilte, elikagaietan gertatzen diren degradazio-erreakzioak eta bakterioen hazkuntza eragozteko edo atzeratzeko. Hartara, elikagaiak luzaroago gorde ahal izango ditugu behar den moduan.
Hozketan (hozkailuko kontserbazioan), 0ºC eta 8ºC arteko tenperaturak erabiltzen dira; eta, izozketan, -18º C-tik beherakoak.
Oro har, zenbat eta tenperatura baxuagoa erabili, orduan eta bakterio gutxiago hazi eta degradazio-erreakzio gutxiago gertatuko dira. Hori dela eta, izoztutako elikagaien kontserbazio-epealdia hoztutakoena baino luzeagoa izango da.
Hona hemen etxeko hozkailua hobeto erabiltzeko zenbait aholku erraz:
Tenperatura egokitzea:
Hozkailuko tenperatura 5ºC ingurukoa izan beharko litzateke; eta izozkailukoa, -18ºC-koa.
Tenperaturari eusteko, oso garrantzitsua da hozkailua beteegi ez edukitzea. Hartara, aire hotza errazago hedatu ahal izango da elikagaietan zehar. Era berean, hotza ez galtzen saiatu beharko garenez, beharrezkoa denean baino ez dugu hozkailua irekiko eta ahalik eta denbora-tarte laburrenean.
Guneak bereiztea:
Hoztutako elikagaiek tenperatura egokiak izango dituzte euren ezaugarrien arabera. Haragiak edo arrainak galkorragoak direnez, hozkailuko gune hotzenean jarri beharko genituzke, hau da, beheko aldean. Barazkiak, ostera, larregizko hotzaren ondorioz alferrik galdu daitezkeenez, hainbesteko hotzik egiten ez duen eremuan gorde beharko ditugu, barazkien tiraderan, hain zuzen ere.
Ateko gunea ere hain hotza ez denez, oso leku egokia da gurinak, marmeladak eta antzeko produktuak jartzeko.
Kutsadura gurutzatuak gutxitzeko, elikagai gordinak edo desizozten ari diren elikagaiak beheko aldean jarriko ditugu, beste produktu batzuetara tantarik ez joateko eta kutsadurarik ez gertatzeko.
Prestatutako janaria eta produktu delikatuagoak (opilak, esaterako) goiko aldean gorde beharko genituzke.
Azkenik, esnekiak, hestebeteak eta irekitako elikagaiak hozkailuko tarteko apalategietan jarriko ditugu.
 

(Visited 93 times, 1 visits today)